Legazpi Berri SL enpresa da San Martineko pentsio zaharraren jabea. Enpresa hau promotorea da eta orain dela hilabete batzuk lursail honetan etxebizitzak eraikitzeko asmoa adierazi zion Legazpiko Udalari. Udalak begi onez ikusi zuen proposamena, eraikuntzaren egoera zein den kontutan izanda eta azken boladan bertan egon diren okupazio arazoak ahaztu gabe.
San Martineko pentsioaren gaur egungo egoera txarra da. Eraikuntza itxita badago ere, azken boladan bertan jendea lotan egon dela jakin izan du Udalak. Egoera honen jarraipena Udaltzaingoak egin du eta eraikuntzaren egoerak duen arriskua ikusita alkateak berak Legazpi Berri SL enpresari eskatu zion eraisteko proiektua lehen bait lehen aurrera eramatea. Bilera hori 2024ko abenduan izan zen eta eraisteko proiektua aste honetan aurkeztu da Udaletxean, beraz, aste gutxitan eraitsiko da eraikuntza.
Etxebizitzak
Etxebizitzak eraikitzeko proiektua, esan bezala, begi onez ikusten du Udalak, honek herrian etxebizitzen eskaintza potente bat izateko aukera emateaz gain, auzoan ere eragin oso positiboa izango duelako, gunea ere urbanizatuko baita.
