Legazpiko Eguneko Zentroak etengabe eskaini dizkie aisialdiko jarduerak erabiltzaileei, COVID-19ak sortutako egoeran egon arren.

Hartu beharreko segurtasun-neurri guztiak betez, ohiko jarduerak eskaini dira, hala nola, gimnasia eta egunkariak irakurtzea; eta eguraldi onarekin, gero eta jarduera gehiago egiten ari dira kanpoaldean.

Nagusilan elkarteko boluntarioek aktiboki jarraitzen dute lankidetzan Eguneko Zentroarekin. Musika-emanaldiak eskaintzen hasi dira terrazan, eta ostiraletan azoka ikustera joateko irteerak egiten hasi dira berriro.

Pandemian, bideokonferentzien bidez komunikatzeko modua bilatu zuten, eta, horrela, boluntarioek etengabe egon dira harremanetan zentroko erabiltzaileekin.

Legazpiko Eguneko Zentroak 26 urte daramatza pertsonei arreta emateko zerbitzua eskaintzen, egunean 8 orduz, astelehenetik igandera.

Pandemia hasi zenetik, ez da kutsatze-kasurik izan Zentroko erabiltzaileen artean.

Udalak eskerrak eman nahi dizkie Zentroko langileei eta Nagusilaneko boluntarioei eta zoriondu egin nahi ditu egindako lan eta dedikazioagatik; bestalde, beren lanarekin jarraitzera animatzen ditu.