Guztira, 7 izan dira 2023ko Olaria Sarirako proposatu diren hautagaiak. Hona hemen zerrenda: Jon Dorronsoro, Jon Maiztegi, Parrokia garbitzeko bolondresak, Jon Amilibia eta Lourdes Zubeldia senar-emazteak, Nagusilan, Osasun-kolektiboa eta Ane Odriozola.
Edizio honetako Epaimahaia honakoek osatzen dute: Alkatea, Udal Korporazioko alderdi politiko bakoitzeko kide bat, iaz saria eskuratu zuen taldeko ordezkari bat (Alaitasuna errondaila eta Jaiotza taldea) eta herriko hiru elkarte hauetako ordezkariak: Lakiolako Kimu Berri, Izadi Zaleak eta KATE.
Gaurko bileran aukeraketari bi bozketa eginez ekingo dio. Lehenengo bozketa batean boto-kopuru gehien jaso dituzten bi finalistak aukeratuko dira eta bigarren bozketan horietatik saria nork eramango duen erabakiko da. Boto-berdinketa emanez gero, Alkatearen kalitateko botoarekin hartuko da erabakia edo, beharbada, saria “ex aequo” ematea, hau da, sari partekatua izatea, erabakiko da.
Alkatea da Epaimahaiburua eta ebazpen-proposamena egingo du. Proposamen hori martxoaren 22an egingo den Bozeramaileen Batzordean aztertuko da eta, ondoren, martxoaren 29an egingo den Osoko Bilkuran hartuko da erabakia.
Urtero legez, maiatzaren 3ko Ezpata-dantza ekitaldian emango da Olaria Saria.
