Aspaldiko lagunak ditugu Mila eta Asier Zornotzarrak. Bikote hau urtero izan dugu Legazpin 2005etik 2010era bitartean, eta aurretik ere bai tarteka, oinez eginiko bere bidaien berri emanez. Besteak beste, Peru, Etiopia, Sahara, Indonesia, Iran eta Himalayara eraman gaituzte. Emanaldi guztietan, bidaietan ikusi, ikasi eta bizi izandakoak erakutsi izan dizkigute: bidaiaren abentura, aurkitutako paisaiaren edertasuna eta bertako biztanleen eguneroko bizitza argazki bidez erakutsiz, bertako musika eta beraien kontakizunarekin uztartuz.
Ostiraleko emanaldiak zaldi gainean egindako bi bidaia biltzen ditu: bata, Sahara basamortuaren iparraldean, Tunis herrialdean. Arabiar zaldi ederren gainean, Nomada beduinoen bideak jarraikiz, harearen gozotasunaz eta dunen itxura leunaz gozatuko dugu.
Bigarrena, Mongoliako lurraldetan. Bertako zaldi txiki baina indartsuen gainean, iparraldeko estepak eta taigak zeharkatuz, elur-oreinen abeltzainak diren Tsaatan tribua ezagutuko dugu. Mongoliaren mendebaldean, zalditik jaitsi eta Altai mendietako Kazajoen lurraldean barneratuko gara oinez, arranoekin ehizan nola aritzen diren ezagutzeko eta Potani glaziarrean Malchin mendia (4037 m) igotzeko.
