Armen Alardea eta San Juan Sua izango dira ekintza nagusiak
Datorren ostegunean, ekainak 23, hainbat eta hainbat ekintza izango dira Legazpin, San Juan bezperako ospakizunen baitan.
Arratsaldean, Armen Alardea. 18:30ean abiatuko dira Laubidetik, eta 20:15ean iritsiko dira Euskal Herria plazara. Han egingo da parte hartzaileen zenbatzea eta azken ekitaldia.
Gauean, berriz, San Juan suaren bueltako jarduerak izango dira: 22:20an hasiko da jaia, txalapartariek toberaz eta txalapartaz egindako deiarekin.
22:30ean, sua piztuko dute, eta txistulariek San Juan zortzikoa joko dute; herritarrak, berriz, dantzan arituko dira. Atzetik, Bertso Olariak bertso eskolako kideen bertsoak izango dira entzungai. Eta, ondoren, herritar guztiek izango dute aukera Bedaioko ingurutxoa dantzan parte hartzeko.
Sua arintzen denean, inguruko hesiak kenduko dituzte, jendeak salto egin dezan.
Amaitzeko, erromeria izango da, txistulariak eta trikitilariak tartekatuz. Besteak beste, ikastaroan ikasitakoak dantzatzeko aukera egongo da.
Udalak deia egin du tentuz ibiltzeko suarekin, eta jendeak ez ditzala piztu suak han-hemenka, nork bere kasa.
