Eskopetari aritzeko ezinbestekoa izango da 16 urte beteta izatea
Aurtengoan ere Armen Alardeak zeharkatuko ditu herriko kaleak San Joan bezperan, ekainak 23 osteguna. Horretarako ordea, ezinbestekoa da herritarren parte hartzea. Lehen izen emate epean, jende gutxik eman du izena eta ondorioz epea luzatu da maiatzaren 31ra arte. Ezin dugu gehiago luzatu, ekitaldia burutzeko Gobernu Delegaziora baimena eskatu behar baitzaio, parte hartzaileen zerrendak bidaliz.
Eskopetari gisa parte hartu nahi duen orok izena eman beharko du Kultur Etxeko Harreran zein Udaletxeko Arreta bulegoan bertan.
Azken urteetan egin den moduan bi zerrenda egingo dira, bata arma lizentzia eta eskopetak dituztenentzat eta bestea arma lizentziarik ez dutenentzat. Azken hauek Udalak eskuratu dituen balagabeko (fogeozko) eskopetak erabiliko dituzte. Izena ematean, honako datu hauek eskatuko dira: izena eta bi abizen, NAN zkia, helbidea eta telefonoa.
Arma lizentzia dutenek, gainera, dagokion arma litzentzia eta egun horretan erabiliko den eskopetaren gida aurkeztu beharko dituzte (kopia egingo zaie).
Arma lizentziarik ez dutenen kasuan berriz, erabiltzeko dauden eskopeta balagabeen (fogeozkoak) kopuru mugatua dela tarteko (45 guztira), izen-emate ordena hartuko da kontuan.
