2021. eta 2022. urteetan 51 auditoretza energetiko egingo dira.
Udalak auditoretza energetikoak egiteko kontratazioa hasi du. Guztira, 51 udal eraikin eta lokalen auditoretza egingo da, 2021. eta 2022. urteetan.
Energia-auditoretza eraikinetan kontsumitutako energien azterketa bat da. Energiaren kontsumoa murriztea da helburua, erosotasun higrotermikoa, osasungarritasuna eta segurtasuna mantenduz eta hobetuz. Finean, energia eta dirua aurreztea eta eraikinetako energia-kontsumoak eragindako berotegi-efektuko gasen emisioak murriztea lortu nahi da.
Kontratazio-prozesua Gipuzkoako Foru Aldundiaren kontratazio-zentralaren bidez egin da. Horren bidez, AUDICERT EDIFICIOS aldi baterako enpresa-elkartea kontratatu da, eta Esparru-akordioa sinatu da espedientera atxiki diren foru- eta udal-erakundeen eraikinen auditoretzak eta energia-ziurtagiriak egiteko. Eraikin horien artean Legazpiko Udala dago.
Kontratazioaren zenbatekoa 32.000 €-koa izan da; horietatik 22.000 €, 2021ean egin beharreko auditoretza energetikoak egiteko dira, eta gainerako 10.000 €, 2022an egin beharreko auditoretza energetikoetarako.
