Legazpik bat egingo du Asteklimarekin, Klima Azoka interaktiboarekin

Urriaren 16tik 25era, Asteklima ospatuko da, Euskadiko Klimaren eta Energiaren Astea, herritarrak klima-aldaketaren aurrean mobilizatzea eta trantsizio energetiko justu baterantz aurrera egitea helburu duen ekimena. Gizarte-, erakunde- eta hezkuntza-eragileek antolatutako jardueren bidez, aurrez aurre ditugun ingurumen-erronkei buruz sentsibilizatu eta kontzientziatu nahi da.

Aurten, Legazpik mugimendu handi honekin bat egiten du proposamen berezi batekin: KLIMA AZOKA, Laubideko oinezkoen gunean egingo den klimaren azoka, urriaren 22an, osteguna, Energiaren Euskal Erakundearen (EEE), Ihobe sozietate publikoaren eta Udaleko Garapen Iraunkorreko Sailaren arteko lankidetzari esker.

Euria egiten badu, Azokan egingo da.

Zer da Klima Azoka?

Esperientzia interaktiboa eta parte-hartzailea da, pertsonei klima-aldaketaren kontzeptu nagusiak modu praktiko eta dibertigarrian hurbiltzeko diseinatua. 7 karpa tematikoren bidez, bisitatzen duten pertsonek klima-aldaketaren ondorioei buruz ikasi ahal izango dute, eta etxetik, eguneroko mugikortasunean, kontsumoan edo aisialdian etorkizun iraunkorrago batean nola lagundu jakin ahal izango dute.

Helburua argia da: pertsona bakoitzak bere eguneroko bizitzan aldaketa txikiak egiteko tresnak eta ideiak hartzea, eta, horiekin, bere komunitatearen eraldaketaren parte aktiboa izatea.

Publiko guztientzako jardunaldia

Goizean, Olamendi Eskola, Institutua eta Haztegi ikastolako ikasleen bisita jasoko du azokak. Tipi Tapa ekimeneko kideak ere esperientzia hori bizitzera hurbilduko dira, ikasketaz beteriko goiz batez ohiko ibilaldia aldatuz.

Eta arratsaldean, 16:00etatik 18:00ak arte, Klima Azoka herritar guztientzat zabalik egongo da. Aukera ezin hobea da familian, lagunekin edo banaka hurbiltzeko eta klima-aldaketaren aurrean keinu bakoitzak nola kontatzen duen jakiteko.

Aurten, EVEk (Energiaren Euskal Erakundea) energiaren inguruko proposamen interesgarriak ekarriko ditu Klima Azokara. Alde batetik, energiaren inguruko dinamika bat eskainiko du, eta bestetik, pantaila ukigarri bat ere jarriko du, non bisitariek energia-kontsumoari buruzko datuak eta informazioa kontsultatu ahal izango duten. 

Eta, hori gutxi balitz, 17:30etik 18:30era, energiari buruzko hitzaldi laburrak eskainiko dituzte, non energia berriztagarrien eta trantsizio energetikoaren inguruko azken berriak eta joerak azalduko dituzten.

Animatu parte hartzera eta egin bat aldaketarekin!