Legazpiko Udalak Aizkorri kaleko hegoaldeko zatia berrurbanizatzeko obren lehen fasea lizitatu du
Legazpiko Udalak lizitaziora atera du Aizkorri kaleko hegoaldeko zatia berrurbanizatzeko obren 1. fasea, hiri-ingurunea hobetzeko eta modernizatzeko udal-planaren barruan dagoen proiektua.
Ekimena aste honetan egindako azken Gobernu Batzordean onartu zen. Proiektua onartu ondoren, obrak kontratatzeko lizitazio-epea ireki da.
Lehenengo fase honetan, Txorronea eta Bikuñako biribilgunearen arteko zatian jardungo da, irisgarritasuna hobetzeko, hiri-azpiegiturak berritzeko eta oinezkoentzako gune atseginagoa eta seguruagoa sortzeko.
Proiektuak zoladurak eta espaloiak berritzea, zerbitzu-sareak ordeztea (hornidura, saneamendua eta argiteria publikoa) eta bide-espazioa berrantolatzea aurreikusten du, oinezkoen, ibilgailuen eta bizikleten arteko bizikidetza errazteko.
Lizitazioaren oinarrizko aurrekontua 1.084.640,15 eurokoa da (BEZa barne), eta gauzatzeko epea 13 hilabetekoa da. Obrak 2026. urtearen hasieran hastea aurreikusten da. Era berean, Gipuzkoako Urak proiektua finantzatzen lagunduko du, jarduketek bere eskumeneko hiri-zerbitzuei eragiten baitiete.
Esku-hartze honekin, Legazpiko Udalak beste urrats bat eman du espazio publikoak eraldatzeko eta hobetzeko konpromisoan, herritarren irisgarritasuna, jasangarritasuna eta bizi-kalitatea lehenetsiz.
