Ospitaleko bloke kirurgiko berriko obrak abian dira, honek bai Legazpi eta baita eskualde osoari mesede egingo diolarik

Ospitaleko bloke kirurgiko berriko obrak hasita daude. Eusko Jaurlaritzako Osasun Sailak eta Osakidetzak bultzatutako azpiegitura estrategikoa da, eta aukera emango du Goierri-Urola Garaiko osasun-arreta modernizatzeko eta indartzeko, Legazpi eskualde honetako kide izanik.   

Alberto Martínez Osasuneko sailburuak eta Lore Bilbao Osakidetzako zuzendari nagusiak duela gutxi aurkeztu zuten proiektua, Goierri-Urola Garaiko ESIko zuzendari gerente Laura Agirrerekin eta ESIko arduradunekin batera. Legazpiko alkatea den Eric Gálvezek ere parte hartu zuen lan-bileran, ESIa osatzen duten udalerrietako beste alkate batzuekin eta Osasun sailburuorde eta Gobernantza eta Jasangarritasun Sanitarioko sailburuorde Gontzal Tamayo eta Aritz Uriarterekin batera, besteak beste.        

Eusko Jaurlaritzak 75 milioi euro inbertituko ditu proiektu honetan. Hauetatik, 58 milioi obra egiteko erabiliko dira, eta 17 milioi, berriz, eraikin berriaren hornidura teknologikorako eta ekipamendurako. Obrak 2028ko abendurako amaitzea aurreikusten da.

Kirurgia-bloke berriaren zerbitzuak eta banaketa 
Kirurgia-bloke berriak 17.000 metro koadro hartuko ditu, zortzi solairutan banatuta, eta diseinu eraginkorra, irisgarria eta funtzionala izango du. Honela banatuko dira solairuak:

1. eta 2. solairuak: Instalazioak eta aparkalekuak   

• Eraikineko instalazio tekniko nagusiak hartuko dituzte.    
• 60 aparkaleku-plaza izango dituzte, ospitalearen irisgarritasuna hobetzeko.     

Beheko solairua: hemodialisia, onarpena eta zerbitzu orokorrak   
• 18 hemodialisi-postu (2 paziente infekziosoentzat eta 2 itxientzat).       
• 3 kontsulta mediko, peritoneoko kontsultarako bat barne.         
• Erizaintzako kontrola, biltegi teknikoak eta ekipoenak, urak tratatzeko gela, garbientzako eta zikinentzako gune bereiziak, langileentzako eremuak eta administrazio-bulegoak.
• Ekitaldi-aretoa, 200 lagunentzako lekua duena, eta 150 m²-ko kafetegia.          
• Erabiltzaileen harrerarako eta arretarako gunea: 3 postu, 4 back office eta 2 bulego espezifiko.
• Segurtasun-espazioak, itxarongela eta komunak. 

Lehenengo solairua: Minaren Unitatea eta endoskopia-eremua    
• Minaren unitatea, 2 kontsultategi eta 6 pazienterentzako tratamendu-gela bat dituena.
• Eguneko ospitale medikoa, 8 posturekin.  
• 4 endoskopia-gela, guztira 14 posturekin, egungo edukiera handituz.    
• Unitatearen, biltegien, bulegoen, komunen eta garbitasun- eta zikin-guneen kontrola.

Bigarren solairua: Kirurgia-eremua eta kirurgia ondokoa    
• Kirurgia txikiko eta kirurgia handi anbulatorioko 4 ebakuntza-gela.        
• 22 postu eguneko ospitale kirurgikoan (2 presio negatibokoak eta 2 itxiak).      
• Erizaintzako kontrola, aldagelak, txosten- eta bilera-gelak, bulegoak, komunak, office eta biltegiak.   

Hirugarren solairua: Esterilizazioa eta instalazio teknikoak 
• Esterilizazio-gela berria eta euskarri tekniko eta logistikoko beste instalazio osagarri batzuk.

Laugarren solairua: Edukiera handiko eta berreskuratzeko ebakuntza-gelak         
• 5 ebakuntza-gela gehiago; guztira 9 ebakuntza-gela daude bloke osoan, gaur egun baino hiru gehiago.         
• anestesia ondoko 14 suspertze-postu (ABU) (4 itxiak eta presio negatiboko 2). 
• Pazienteak prestatzeko gunea, 5 posturekin, aldagelak, txosten-gelak, bulegoak, biltegiak, komunak eta atseden-eremua barne.   

 Bosgarren solairua: Instalazio teknikoak      
• Berokuntza-sistemak, aire girotua eta eraikineko gainerako instalazioak hartuko ditu.  
Nabarmentzekoa da Ospitalea dela hemodialisi-unitatea duen Osakidetzako eskualde-mailako bakarra. Funtsezko zerbitzua da Goierriko eta Urola Garaiko giltzurrun-gutxiegitasun kronikoa duten pazienteentzat, Legazpi barne.

Kirurgia-bloke berriak aukera emango du itxarote-denborak murrizteko, asistentzia-zirkuituak optimizatzeko eta osasun-langileen lan-baldintzak hobetzeko, eta, horrela, ospitalearen kalitatea eta erantzuteko gaitasuna indartuko dira herritarren egungo eta etorkizuneko premien aurrean.     

Legazpiko alkatea den Eric Gálvezek nabarmendu du jarduera horrek eskualde osoan duen garrantzia: "Inbertsio hau oso berri ona da Legazpirentzat eta inguruko herrientzat. Osasun-arretaren kalitatea hobetuko du, eta gure auzotarren azpiegiturak modernizatuko ditu". "Legazpiko Udalak informazio zehatza emango du obren aurrerapenei buruz eta proiektu honen mugarri garrantzitsuenei buruz, eskualde osorako osasun-arreta modernizatzeko aurrerapauso bat baita."    

Ospitalearen inguruko lanak hasita daude, eta lurra prestatu, sarbideak egokitu eta kanpoko instalazioak hobetu dira. Prozesu osoan, ospitaleko asistentzia-jarduera normaltasunez mantenduko da.