Ekimen desberdin eta berritzailea da, hurbiltasun handiagoa bilatzen duena.
Gobernu taldeak konpromisoa hartu du herritarren benetako beharrei modu eraginkorrean erantzuteko, hori baita gure lan politikaren ardatz nagusia. Hori lortzeko, funtsezkoa iruditzen zaigu administrazio hurbila izatea eta entzute aktiboa sustatzea.
Helburu horrekin, "Eraiki dezagun Legazpi" proiektua jarri dugu martxan. Proiektu horren bidez, gobernuko kideok udalerriko hainbat tokitan ibili gara herritarren ekarpenak eta proposamenak zuzenean entzuten. Ekimen horri esker, 176 ekarpen jaso ditugu, eta horietako bakoitzari banan-banan erantzun diogu bai alkateak eta baita gobernu-taldeko zinegotziek ere. Gaur egun, jasotako jarduera asko dagoeneko egin dira edo lantzen ari dira, eta horien jarraipena egin daiteke udalaren webgunean. Ziur gaude herritarrekin batera egindako ahalegin horrek nabarmen lagunduko duela herritarren bizi-kalitatea hobetzen.
Gainera, banakako bilerak egin ditugu udalerriko elkarte eta klub bakoitzarekin, haien behar espezifikoak ezagutzeko. Elkarte horiek Legazpi bizia, dinamikoa eta solidarioa mantentzeko duten garrantzia aitortzen dugu. Funtsezkoa iruditzen zaigu haiekin guztiekin harreman erraza izatea, eta, bide batez, eskerrak eman nahi dizkiegu guztiei beren lanagatik eta gure herriarekin duten konpromiso hautsiezinagatik.
Gogorarazi nahi dugu, herritar guztiek eska dezaketela alkatearekin eta zinegotziekin biltzeko hitzordua, edozein kezka edo arazori aurre egiteko. Hala ere, haratago joan nahi dugu. Gobernu taldeak herritarrengana hurbiltzeko eta jende guztiak parte hartzeko aukera izan dezan, Eric Galvez alkateak udaletxera joateko zailtasunak dituzten herritarren etxeak bisitatzeko prest dagoela adierazi nahi du. Beharrezkoa izanez gero, gobernu-taldeko zinegotziek ere lagunduko diote alkateari hitzordu horietan.
Helburua da herritarrek Udala hobeto kudeatzeko edo beste gai interesgarri batzuetarako garrantzitsutzat jotzen dituzten ekarpen guztiak jasotzea, bai eta haien kezkak entzutea eta konpontzen saiatzea ere.
Hitzordua eskatzeko, nahikoa da udalarekin harremanetan jartzea:
Telefonoa:
Udalerriaren barruan, Herritarren Arreta Zerbitzua: 010
Udalerritik kanpo, Herritarren Arreta Zerbitzua: 943 73 70 30
Helbide elektronikoa: Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.
